Hasan Shahnawaz Zaidi
kisi banjar taḳhayyul par kisi be-ab rishte men
zara Thahre to patthar ban ga.e ahbab raste men
sarabon ki gali hai ya tire gaanv ka kona hai
laga hai ḳhaak par shishe ka ik talab raste men
abhi kuchh der pahle paanv ke niche na the badal
abhi phaila ga.i hain teri ankhen ḳhvab raste men
miri tayyariyan mere safar men ho ga.iin haa.il
kabhi ta.aviz baazu par kabhi mehrab raste men
samundar apne markaz men khincha hai meri ankhon ka
so ab mumkin nahin hai rokna sailab raste men
main kaafi der pahle jis ko ghar men chhoḌ aaya tha
khaḌa hai munh phula.e ab vahi mahtab raste men
safar asan nahin hota kamar pe laad kar duniya
chale to rafta rafta rah gaya asbab raste men
ham aise rah-rau the koi bhi manzil na ho jin ki
safine aarzu ke ho ga.e gharqab raste men
Leave a Reply