Aleena Itrat
lo aftab ne sab ḳhatm iḳhtilaf kiya
dhuan dhuan the jo manzar sabhi ko saaf kiya
shafaq ka laal dupaTTa oḌha ke vaadi ko
vajud-e-ishq ka suraj ne e’tiraf kiya
kisi ḳhayal men gharqab garm sanson ne
dabi hui kisi hasrat ka inkishaf kiya
ik abshar kei shaffaf narm halchal ne
kamal kar diya sang-e-badan shigaf kiya
ki bazgasht to jaari hai in ghaTaon kei
pa barishon ne kahan ja ke etakaf kiya
ghaTa ne chand ka ghunghaT sanvarne ke liye
hisar-e-nur men sau martaba tavaf kiya
tumhare ḳhauf se ham munh chhupa.e phirte hain
ye raushni se andheron ne e’tiraf kiya
Leave a Reply