Talash-E-Kaun-O-Makan Hai Na La-Makan Ki Talash

talash-e-kaun-o-makan hai na la-makan ki talash

ye zindagi hai gham-e-ishq-e-javedan ki talash

isi zamin ko hamen asman banana hai

hamen nahin hai kisi aur asman ki talash

kisi ko manzil-e-ishrat ka gham hai aur mujhe

hui hai manzil-e-ishrat pe karvan ki talash

ye ḳhvab hai ki hai tabir-e-ḳhvab ai gham-e-dil

har ik qadam hai yahan umr-e-ra.egan ki talash

bahar-e-lala-o-gul barq-e-be-aman nikli

kahan kahan na rahi mere ashiyan ki talash

jo ho sake to mira gham hi javedan ho jaa.e

‘jamal’ mujh ko nahin aish-e-javedan ki talash