Dilshad Naseem
lagega na dil tera tanha miri jaan
nahin tum ne lekin ye samjha miri jaan
ye a.ina hairat se takta hai mujh ko
na jaane kiya is pe biita miri jaan
ye dil to hai kya chiiz jaan tujh ko deti
agar tu kabhi mujh se kahta miri jaan
ki ham tum milenge kisi bhi janam men
kabhi tum ne bhi socha aisa miri jaan
vo sapna tha ya phir mire paas the tum
koi tum sa mujh men tha mahka miri jaan
mira ishq dariya ko tai kaise karta
ghaḌa bhi tha bilkul hi kachcha miri jaan
tu ban ke muqaddar ka taara tha chamka
abhi kal hi shab main ne dekha miri jaan
Leave a Reply