tum miri aankh ke tevar na bhula paoge
an-kahi baat ko samjhoge to yaad a.unga
ham ne ḳhushiyon ki tarah dukh bhi ikaTThe dekhe
safha-e-zist ko palToge to yaad a.unga
is juda.i men tum andar se bikhar jaoge
kisi ma.azur ko dekhoge to yaad a.unga
isi andaz men hote the muḳhatib mujh se
ḳhat kisi aur ko likkhoge to yaad a.unga
meri ḳhushbu tumhen kholegi gulabon ki tarah
tum agar ḳhud se na bologe to yaad a.unga
aaj to mahfil-e-yaran pe ho maghrur bahut
jab kabhi TuuT ke bikhroge to yaad a.unga
Leave a Reply