apni aur kisi se kis din rah-o-rasm-o-rifaqat thi
aati jaati saans thi jis ki saa.at sangat thi
tujh ko ḳhayal na aaya varna kis din itne garan the ham
ik do harf-e-muravvat socho kaun si aisi qimat thi
main bhi apni dhun men ravan tha vo bhi apne-ap men gum
baat ki naubat kaise aati kis ko itni fursat thi
biit chuke vo din vo zamane rahat bhari aziyyat ke
yaad kise ab kaun bata.e duuri thi ki vo qurbat thi
kucha kucha phailen baten qat.a-e-ta.alluq-ḳhatir ki
auron ka to zikr hi kya divar-o-dar ko hairat thi
kitne hain jo ab tak pahunche apni zaat ki manzil tak
harf-o-bayan se baat hai bahar aisi kaḌi masafat thi
gosha-gir faqir the ham to maslak ijz-o-niyaz ‘bashir’
kyuun be-sud kisi se ulajhte apni kis se adavat thi
Leave a Reply