Sufi
dhoka hai us ka janib-e-aghyar dekhna
jab ham na hon to rang-e-rukh-e-yar dekhna
tujh se bichhadna yuun bhi qayamat se kam na tha
is par tira palat ke vo ik baar dekhna
apne ghamon ka bojh utha apne dosh par
tauhin-e-gham hai janib-e-gham-khvar dekhna
vo shakl ek khvab thi aur khvab khvab hai
kab tak ye khvab dida-e-bedar dekhna
rahte hain shahr-e-sang men shishe ka dil liye
logo hamara jazba-e-isar dekhna
‘abid’ qadam to maqtal-e-fan ki taraf badha
kitne hain tere sar ke talabgar dekhna
Leave a Reply