Balwan Singh Azar
do qadam saath kya chala rasta
ban gaya mera ham-nava rasta
bichhḌa apne musafiron se jab
kitna mayus ho gaya rasta
sab hain manzil ki justuju men yahan
kaun dekhe bura bhala rasta
aisi hone lagi thakan us ko
din ke Dhalte hi so gaya rasta
phir na.i ka.enat dekhunga
mere andar agar mila rasta
tu baḌa ḳhush-nasib hai ‘azar’
tujh pe asan ho gaya rasta
Leave a Reply