Poet
zargar-o-haddad ḳhush hon vo karen tadbir ham
tauq-e-zar tum pahno pahnen ahani zanjir ham
aur divanon se rakhte hain zara tauqir ham
Dalte hain aap apne paanv men zanjir ham
kufr-o-din ke qa.ede donon ada ho ja.enge
zab.h vo kafir kare munh se kahen takbir ham
yuun hi ḳhush karte hain dil apna umid-e-vasl men
khinchte hain ek ja apni tiri tasvir ham
aa gaya jis din ḳhayal-e-joshish-e-divanagi
chaak kar Dalenge apna nama-e-taqdir ham
sun to o zalim bhala ye bhi koi insaf hai
la.eq-e-altaf aada qabil-e-tazir ham
vasl mere un ke hoga kuchh ab is men shak nahin
kah do amin de chuke is ḳhvab ki ta.abir ham
roz ka jhagḌa uTha.e kaun kar lete hain aaj
imtihan-e-kavish-e-qatil tah-e-shamshir ham
kyuun na mustaghni rahen fazl-e-ḳhuda se ai ‘nasim’
rakhte hain mulk-e-suḳhan ki vaqa.i jagir ham
Leave a Reply