Poet
ai sitamgar ai hava-surat
gahe-gahe hamen dikha surat
koi surat nahin hai ab mumkin
hai yahi ek mumkina surat
jaan men jaan aa.i muddat ba.ad
jab nazar aa.i ashna surat
guftugu ghair se rahi us ki
main faqat dekhta raha surat
zehn-o-dil men sama.egi kaise
ye tasavvur se mavara surat
parkon men dikha.i deti hai
ek se ek dilruba surat
dekh leta hai aadmi sab kuchh
yaad hoti hai a.ina-surat
dil men bharti hai vasvase ‘nami’
ye tumhari ḳhafa-ḳhafa surat
Leave a Reply