Kis Liye Jashn-E-Ana Mahfil-E-Idrak Mein Hai

kis liye jashn-e-anā mahfil-e-idrāk meñ hai

merī tārīḳh mire dāman-e-sad-chāk meñ hai

phir uThā josh-e-junūñ jazba-e-mansūr liye

phir anal-haq kī sadā kūcha-e-saffāk meñ hai

maut anjām hai māhaul hai ġhaflat kā yahāñ

vaqt har lamha shikārī kī tarah taak meñ hai

fat.h-e-taqdīr kā e.ajāz samajhne vaale

fat.h poshīda tirī jur.at-e-be-bāk meñ hai

Leave a Comment