Amit Sharma Meet
sach kahne ka aḳhir ye anjam hua
saari basti men main hi badnam hua
qatl ka mujrim rishvat de kar chhuT gaya
qismat dekho mere sar ilzam hua
mere gham par vo aksar hans deta hai
ye to gham ka ghair munasib daam hua
zaḳhm yahan to vaise ka vaisa hi hai
tum batlao tum ko kuchh aram hua
tanha.i ne jab se qaid kiya mujh ko
bahar aane men tab se nakam hua
roz masa.il ghere hain mujh ko to ab
soch raha huun gardish-e-ayyam hua
aḳhbaron men ḳhud ko paḌhte sochun huun
‘mit’ yahan par mera bhi kuchh naam hua
Leave a Reply