Dil Hasin Hai To Mohabbat Bhi Hasin Paida Kar

pahle to husn-e-amal husn-e-yaqin paida kar

phir isi khaak se firdaus-e-barin paida kar

yahi duniya ki jo but-khana bani jaati hai

isi but-khane se kaabe ki zamin paida kar

ruh-e-adam nigaran kab se hai teri janib

uth aur ik jannat-e-javed yahin paida kar

khas-o-khashak-e-tavahhum ko jala kar rakh de

yaani atish-kada-e-soz-e-yaqin paida kar

gham mayassar hai to is ko gham-e-kaunain bana

dil hasin hai to mohabbat bhi hasin paida kar

asman markaz-e-takhil-o-tasavvur kab tak

asman jis se khajil ho vo zamin paida kar

dil ke har qatre men tufan-e-tajalli bhar de

batn-e-har-zarra se ik mahr-e-mubin paida kar

bandagi yuun to hai insan ki fitrat lekin

naaz jis pe karen sajde vo jabin paida kar

pasti-e-khak pe kab tak tiri be-bal-o-pari

phir maqam apna sar-e-arsh-e-barin paida kar

ishq hi zinda o painda haqiqat hai ‘jigar’

ishq ko aam bana zauq-e-yaqin paida kar

Leave a Comment