Kausar Niyazi
us ne har mashq-e-sitam ham pe rava rakkhi hai
ham ne avaz bhi siine men daba rakkhi hai
qatl-gahon men lahu apna nichhavar kar ke
sham-e-insaf ki lau ham ne baḌha rakkhi hai
kahin bikhri hain kitaben kahin maile kapḌe
ghar ki halat hi ajab ham ne bana rakkhi hai
apne vahshat-zada kamre ki ik almari men
teri tasvir aqidat se saja rakkhi hai
ham kisi baat ka shikva na karenge ‘kausar’
mohar honTon pe ḳhamoshi ki laga rakkhi hai
Leave a Reply