ghamon ki raat hai aur itni muḳhtasar bhi nahin
bahut dinon se tumhari koi ḳhabar bhi nahin
ai shahr-e-dil tiri galiyon men ḳhaak uḌti hai
ye kya hua ki yahan koi nauhagar bhi nahin
tu mere saath nahin hai to sochta huun main
ki ab to tujh se bichhaḌne ka koi Dar bhi nahin
main apna dard kisi aur se kahun kaise
mire badan pe koi zaḳhm-e-mo’atabar bhi nahin
chalao tegh ki ab is men sochna kya hai
mire harif mire haath men sipar bhi nahin
hain teri fat.h men ab bhi shikast ke imkan
miri shikast men andesha-e-zafar bhi nahin
jo vashgaf kare mere ramz ko ‘shahid’
suḳhan-varon men koi aisa dida-var bhi nahin
Leave a Reply