dil ne Thokar kha ke samjha hadisa kya chiiz hai
gham kise kahte hain dard-e-la-dava kya chiiz hai
mahv-e-hairat huun ye duniya se juda kya chiiz hai
aap ka paigham be-harf-o-sada kya chiiz hai
is ke ma.ani ḳhud-pasandi ke siva kuchh bhi nahin
dil men paiham ḳhvahish-e-dad-e-vafa kya chiiz hai
ab andhera hi andhera hai ufuq-ta-ba-ufuq
is haqiqat men ḳhilaf-e-majra kya chiiz hai
kufr hai ye sochna bhi karobar-e-ishq men
mudda.a kya shai hai tark-e-mudda.a kya chiiz hai
sar hai zeb-e-dar lekin lab tabassum-ashna
haq-nava.i par main ḳhush huun ye saza kya chiiz hai
kar-ara.i-e-sa.i-e-shauq hai pesh-e-nazar
varna socho jumbish-e-parda-kusha kya chiiz hai
ham raza-e-dost men raazi hain ye sach hai to phir
dekhna hoga ki dastur-e-dua kya chiiz hai
rafta rafta tum pe sab kuchh aa.ina ho ja.ega
kya bata.un sa.i-e-tark-e-mudda.a kya chiiz hai
jalva-gah-e-naz se uThna koi asan nahin
pahle ye dekho yahan zanjir-e-pa kya chiiz hai
jin ki fitrat na-shanas-e-zauq-e-mohkam hai ‘uruj’
main unhen ye kaise samjha.un vafa kya chiiz hai
Leave a Reply