Poet
ai ḳhaar ḳhar-e-hasrat kya kya figar hain ham
kya haal hoga us ka jis dil men ḳhaar hain ham
har chand dil men tere zalim ghubar hain ham
kitne dabe hue hain kya ḳhaksar hain ham
kya jaane kya dikha.e kam-baḳht raz-e-dushman
be-iḳhtiyar ho tum aur be-qarar hain ham
vaan shoḳhiyon ne maare nakam kaise kaise
yaan sadgi se kya kya umid-var hain ham
ne raḳht mai-kade men ne ka.abe ka irada
hain dil lagi ke bande yaron ke yaar hain ham
vaan sarguzisht-e-dushman vo kah rahe hain munh par
yaan be-ḳhudi hai is par kya raz-dar hain ham
saaqi tiri nigahen kab tak rahengi palTi
hai nashsha zahidon ko aur bada-ḳhvar hain ham
ka.aba hai sang-e-balin zohad-e-ḳhufta dil ka
aur mai-kade ke andar shab-zinda-dar hain ham
allah re zarf-e-dil ka sab ki jagah hai is men
be-gham rahe hai dushman kya gham-gusar hain ham
ai hashr bach ke chalna ai charḳh haT ke girna
hai barq saaya jis ka vo ḳhar-zar hain ham
itni ḳhalish mizha ki ab baḌh ga.i ki goya
zaḳhm-e-dil-e-adu men ḳhanjar-guzar hain ham
kab tak rahega dushman jaame se apne bahar
ho aag aag jis se tum vo sharar hain ham
dushman ki jeb men tum sabr-o-shakeb men ham
tum dast-e-kotahi ho pa-e-nigar hain ham
vadi-e-justuju se guzrin to kya ajab hai
varafta kaise kaise lail-o-nahar hain ham
kya bada-e-javani mard-azaman nasha tha
ab ai ‘qalaq’ vabal-e-ḳhvab-o-ḳhumar hain ham
Leave a Reply