Aaj Ek Harf Ko Phir Dhundta Phirta Hai Khayal

aaj ik harf ko phir DhunDta phirta hai khayal

madh bhara harf koi zahr bhara harf koi

dil-nashin harf koi qahr bhara harf koi

harf-e-ulfat koi dildar-e-nazar ho jaise

jis se milti hai nazar bosa-e-lab ki surat

itna raushan ki sar-e-mauja-e-zar ho jaise

sohbat-e-yar men aghaz-e-tarab ki surat

harf-e-nafrat koi shamshir-e-ghazab ho jaise

ta-abad shahr-e-sitam jis se tabah ho jaaen

itna tarik ki shamshan ki shab ho jaise

lab pe laun to mire hont siyah ho jaaen

aaj har sur se har ik raag ka naata tuuta

DhunDti phirti hai mutrib ko phir us ki avaz

joshish-e-dard se majnun ke gareban ki tarah

chak-dar-chak hua aaj har ik parda-e-saz

aaj har mauj-e-hava se hai savali khilqat

la koi naghma koi saut tiri umr daraz

nauha-e-gham hi sahi shor-e-shahadat hi sahi

sur-e-mahshar hi sahi bang-e-qayamat hi sahi

Leave a Comment