Bajae Koi Shahnai Mujhe Achchha Nahin Lagta

Amir Ameer

baja.e koi shahna.i mujhe achchha nahin lagta

mohabbat ka tamasha.i mujhe achchha nahin lagta

vo jab bichhḌe the ham to yaad hai garmi ki chhuTTiyan thiin

tabhi se maah july mujhe achchha nahin lagta

vo sharmati hai itna ki hamesha us ki baton ka

qariban ek chautha.i mujhe achchha nahin lagta

na-jane itni kaḌvahaT kahan se aa ga.i mujh men

kare jo meri achchha.i mujhe achchha nahin lagta

mire dushman ko itni fauqiyat to hai bahar-surat

ki tu hai us ki ham-sa.i mujhe achchha nahin lagta

na itni daad do jis men miri avaz dab jaa.e

kare jo yuun pazira.i mujhe achchha nahin lagta

tiri ḳhatir nazar-andaz karta huun use varna

vo jo hai na tira bhaa.i mujhe achchha nahin lagta