siyahi girti rahe aur diya ḳharab na ho
ye taq-e-chashm ab itna bhi kya ḳharab na ho
har aane vaala isi tarah se tujhe chahe
miri bana.i hui ye faza ḳharab na ho
azal abad men Thani hai so main nikalta huun
miri kaḌi se tira silsila ḳharab na ho
ham us hava se to kahte hain kyuun bujhaya charagh
kahin charagh ki apni hava ḳharab na ho
main apni shart pe aaya tha is ḳharabe men
so mere saath koi dusra ḳharab na ho
miri ḳharabi ko yakja karo kahin na kahin
mira muamla ab ja-ba-ja ḳharab na ho
ḳharab huun bhale is ishtiha men ham aur tum
par ek dusre ka za.iqa ḳharab na ho
Leave a Reply