junun-e-be-ḳhudi ke saz-o-saman dekhne vaale
baḌi hairat men hain mera gareban dekhne vaale
tumhari zulf ki uljhan men phans kar niind kho baiThe
kabhi sote nahin ḳhvab-e-pareshan dekhne vaale
abhi bhaḌkega soz-e-gham abhi ye zaḳhm kudenge
zara Thahren mire dil ka charaghan dekhne vaale
miri Thahri hui duniya men halchal si macha Daali
dabe-panv chalen gor-e-ghariban dekhne vaale
kahin soti hui duniya na pa.emal ho jaa.e
zara ahista ai gor-e-ghariban dekhne vaale
uTha.enge na ai ‘naḳhshab’ kabhi nazren su-e-jannat
tasavvur men bahar-e-ku-e-janan dekhne vaale
Leave a Reply