abu-mohammad-wasil-bahraichi

Tasawwuraat Mein Inko Bula Ke Dekh Liya

tasavvurat men in ko bula ke dekh liya

zamane bhar ki nazar se chhupa ke dekh liya

fasana-e-gham-e-furqat suna ke dekh liya

unhon ne sirf mujhe muskura ke dekh liya

kabhi kisi ne sar-e-tur ja ke dekh liya

kabhi kisi ne kisi ko bula ke dekh liya

nigah-e-parda-kusha ka kamal kya kahna

jahan jahan vo chhupe us ne ja ke dekh liya

kaha tha un ko na bulvao vo na aenge

hamari baat na maani bula ke dekh liya

ye kis ke vaste aansu bahae jaate hain

tumhen kisi ne jo us vaqt aa ke dekh liya

kisi ne bhi na diya saath marne vaale ka

har ik rafiq pe sab kuchh luta ke dekh liya

mizaj-e-husn to ik haal par raha qaaem

lutane valon ne sab kuchh luta ke dekh liya

khushi ki baat hai nikli to hasrat-e-didar

karam-navaz ko sab kuchh luta ke dekh liya

rumuz-e-husn junun-ashna rahe varna

khirad pukarti jalve khuda ke dekh liya

ghurur-e-husn ki khuddariyan khud aa na saka

shua-e-husn ko markaz pe la ke dekh liya

kabhi na tum ne mizaj-e-dil-e-hazin puchha

bas ab muaaf karo aazma ke dekh liya

kahin thikana nahin ham qafas-nasibon ka

chaman men rah ke nasheman bana ke dekh liya

vafa-shiar vafaon se baaz aa na sake

unhon ne khvab unhen aazma ke dekh liya

sivae aap ke koi na ban saka apna

har ek shakhs ko apna bana ke dekh liya

tum aa gae dam-e-akhir bada kiya ehsan

khata muaaf jo tum ko bula ke dekh liya

jo dil se aae zaban par vo raaz raaz kahan

jo razdan the unhen bhi bata ke dekh liya

janaza dekh ke ‘vasil’ ka ho gae betab

kafan unhon ne bil-akhir hata ke dekh liya

More Poems

Leave a Comment