bahar ban ke jab se vo mire jahan pe chha.e hain
tajalliyon ki chandni hai maktabon ke saa.e hain
Thahar Thahar ke ḳhush-gavar inqalab aa.e hain
sambhal sambhal ke vo mire junun pe muskura.e hain
hazar ehtiyat ki hai laakh gham chhupa.e hain
magar taḌap uTha hai dil vo jab bhi yaad aa.e hain
samajh samajh ke barha ye ban pare ki baat hai
fareb in ki mehrbaniyon ke ham ne khaa.e hain
sahar sahar mahak uThi chaman chaman sanvar gaya
bahar muskura.i hai ki aap muskura.e hain
jo dil saja chuke the ḳhud-parastiyon ki anjuman
ham un men jazba-e-gham-e-jahan ubhar aa.e hain
naqab ruḳh se jab uThi bikhar ga.iin tajalliyan
latif bijliyan giri hain jab vo muskura.e hain
dayar-e-tegh-o-dar ke jamal ko nikhar ke
ham apne ḳhuun se maqtal-e-vafa sanvar aa.e hain
kabhi libas-e-nazm men kabhi ghazal ke ruup men
jo vaqt ki pukar the vo giit ham ne gaa.e hain
‘nihal’ ka.enat men hamen to ye yaqin hai
ab aadmi nahin raha hai aadmi ke saa.e hain
Leave a Reply