gulon pe shabnam nahin lahu hai
ye kaisi saughat-e-rang-o-bu hai
bahar ḳhanjar-ba-dast aai
har ik manzar lahu lahu hai
koi tamanna nahin hai mujh ko
sukun-e-dil ki hi aarzu hai
main ik muddat se lapata huun
mujhe ḳhud apni hi justuju hai
ye be-dili ki namaz teri
guman hota hai be-vuzu hai
is ko aksar main sochta huun
miri ghazal ki jo aabru hai
mira nahin hai ‘asad’ ye chehra
to kaun shishe men ru-ba-ru hai
Leave a Reply