Nadeem Bhabha
dil se ik yaad bhula di ga.i hai
kisi ghaflat ki saza di ga.i hai
main ne manzil ki dua mangi thi
meri raftar baḌha di ga.i hai
aib divar ke honge zahir
meri tasvir haTa di ga.i hai
main ne ik dil pe hukumat kya ki
mujhe talvar thama di ga.i hai
ab mohabbat ka sabab hai vahshat
varna hasrat to miTa di ga.i hai
ab yahan se nahin ja sakta koi
ab yahan sham.a jala di ga.i hai
mujh men ab phuul nahin nahin khil sakte
meri ab ḳhaak uḌa di ga.i hai
is liye jam ke yahan baiTha huun
mujh ko meri hi jagah di ga.i hai
Leave a Reply