Athar Shakeel
hijr ki rut hai tira ruup magar samne hai
haan vahi chehra vahi dida-e-tar samne hai
ḳhuub hai shahr-e-aman tera yahan bhi ai jaan
jis se ham bach ke chale the vo ḳhatar samne hai
ab nahin koi yahan hausla dene vaala
phir vahi dasht vahi sham-e-safar samne hai
saath chalti thiin abhi ek nagar ki chiḳhen
ab koi dusra majruh nagar samne hai
ab bhi hai duuri ka ehsas ki shal hain paanv
yuun to main shahar men huun aap ka ghar samne hai
dhuup ki tez tapish aur safar hai dar-pesh
sa.eban koi yahan hai na shajar samne hai
agle lamhe ka bhala kis ko yaqin hai ‘at.har’
zindagi kya hai bas ik raqs-e-sharar samne hai
Leave a Reply