kya ḳhaak kahun matlab-e-dildar ke aage
so aur suna.ega vo aghyar ke aage
bola tha jo aghaz-e-mohabbat men baḌa bol
aaya vahi aḳhir dil-e-bimar ke aage
roka hi kiya zabt-e-mohabbat sar-e-mahfil
sar jhuk hi gaya us but-e-ayyar ke aage
paida nahin duniya men dava-e-maraz-e-ishq
kya log na hote the is azar ke aage
fariyadi-e-be-dad-e-jafa jaan ke mujh ko
mahshar men vo chalte hue lalkar ke aage
marta hai kasi aur pe ab ghair suna hai
bolunga kabhi jhuuT na sarkar ke aage
aa jaa.e ‘nasim’ us ko tarahhum to ajab kya
chal le to chalen tujh ko tire yaar ke aage
Leave a Reply