Arshad Siddiqui
dilon se yas-o-alam ke naqab utaro to
sahar bhi ruup dikha.egi shab guzaro to
faza ke siine men naghmon ke lai utaro to
usi ada se zara phir mujhe pukaro to
mire ghamon ke dhundalke bhi chhaT hi ja.enge
tum apne gesu-e-shab-rang ko sanvaro to
kahan ga.e mujhe tarikiyon men uljha kar
hayat-e-rafta ke lamho zara pukaro to
ḳhizan-rasida fazaon ko ro.o.ge kab tak
bahar gosh-bar-avaz hai pukaro to
phir is ke ba.ad sahar hi sahar hai ai ‘arshad’
ruḳh-e-hayat ke tevar zara nikharo to
Leave a Reply