Ashu Mishra
aise khulte hain falak par ye sitare shab ke
jis tarah phuul hon saare ye bahar-e-shab ke
teri tasvir bana kar tiri zulfon ke liye
ham ne kaghaz pe ka.i rang utare shab ke
vo musavvir jo banata hai sahar ka chehra
us se kahna ki abhi dard ubhare shab ke
kya kisi shaḳhs ki hijrat men jali hain raten
kyuun shararon se chamakte hain sitare shab ke
ye tire hijr ne tohfe men diye hain ham ko
ye jo ma.asum se rishte hain hamare shab ke
ek muddat se hamen niind na aa.i ‘ashu’
umr ik kaaT di ham ne bhi sahare shab ke
Leave a Reply