ḳhuda-numa hai but-e-sang-e-astana-e-ishq
chalunga pa-e-nigah ban ke su-e-ḳhana-e-ishq
na kam hon sikka-e-dagh-e-dil-e-yagana-e-ishq
bhara paḌa rahe yarab sada ḳhazana-e-ishq
jabin-e-qais bani sang-e-astana-e-ishq
junun hai ḳhema-e-laila siyah-ḳhana-e-ishq
mudam dil men rahe dagh-e-ulfat-e-saqi
na be-charagh ho yarab sharab-ḳhana-e-ishq
ye mahfil-e-tarab-e-husn hai nahin maqtal
sada gulu-e-burida ki hai tarana-e-ishq
ye kah ke phirti hai din raat asiya-e-falak
mile to ḳhirman-e-mah de ke luun main dana-e-ishq
hai aftab piyala farishta-ḳhu saaqi
ḳham-e-falak hai subu-e-sharab-ḳhana-e-ishq
bas ek haath men do ho ke main zamin pe gira
qaza jo aa.i ada ho gaya dogana-e-ishq
har ek gaam pe dil pista hai ablaq-e-chashm
magar hai surme ka dumbala taziyana-e-ishq
jalaya tuur ko ik dam men sa.iqa ban kar
sharar-fishan jo hua sang-e-astana-e-ishq
ho ḳhana-e-sadaf-e-dil na kis tarah pur-nur
ki aap hai guhar-e-shab-charagh dana-e-ishq
buto ḳhuda ne kaha fis-sama-e-rizqokum aap
mila hai mujh ko ye haft asiya se dana-e-ishq
ye sach masal hai buto sab ka hai ḳhuda razzaq
nasib-e-ta.ir-e-dil hai azal se dana-e-ishq
jo ḳhaal ban ke ḳhat-e-ruḳh men dil rahe mera
kahun main ḳhirman-e-mah men mila ye dana-e-ishq
kisi ke abru-e-pur-ḳham ka dhyan rahta hai
hamara ka.aba-e-dil hai siyah-ḳhana-e-ishq
sada-e-matam-e-dil sun ke ḳhush vo hote hain
nava-e-sina-zani hai ki shadiyana-e-ishq
jo shauq-e-did hai muusa ki tarah ek na sun
ki lantarani-e-ishq hai tarana-e-ishq
naqab udhar vo uTha.en idhar main aah karun
samand-e-husn pe paḌ jaa.e taziyana-e-ishq
jo toliye ise kaunain ki tarazu men
garan ho vazn men na asiya se dana-e-ishq
farogh-e-bazm-e-tasavvur hai yaad pistan ki
habab-e-husn bane hain charagh-e-ḳhana-e-ishq
ḳhayal-e-gauhar-e-dandan men ham jo rote hain
sarishk-e-dida-e-tar hai dur-e-yagana-e-ishq
hai mere dil ki tarah is se ye pareshan-hal
mila hai zulf ko husn-e-siyah-ḳhana-e-ishq
chaḌha jo daar pe ashiq ka sar hua sardar
juda hai ḳhana-e-alam se karḳhana-e-ishq
ḳhuda ka ghar ho jo TuuTe jihad-e-nafs se dil
ḳharab ho to bane la-makan ye ḳhana-e-ishq
vo dil laga ke sunen dastan ki surat
bayan kijiye us husn se fasana-e-ishq
‘vazir’ tuḳhm-e-mohabbat ko dil men bo apne
zamin vo shor hai jis men uge na dana-e-ishq
Leave a Reply