Poet
ḳhushk miTTi men lahu ki jo nami aa.egi
dekhna baagh men phir sabz pari aa.egi
kaT ga.i umr isi dhun men safar karte hue
do qadam aur abhi chhanv ghani aa.egi
sachche alfaz baratne lage ash.ar men ham
apne hisse men bhi hiire ki kani aa.egi
dam-ba-dam ḳhuun ki ravani men bhanvar paḌte hain
aisa lagta hai koi saḳht ghaḌi aa.egi
dekh kar saḳhti-e-halat guman hai ‘anjum’
apne ba.ad aa.egi jo nasl jari aa.egi
Leave a Reply