Kashif Rafiq
jo teri aankh hai pur-nam yahi mohabbat hai
ki tujh ko hai jo mira gham yahi mohabbat hai
hazaron miil ki duuri ke bavajud ai dost
jo ham men rabt hai paiham yahi mohabbat hai
tiri juda.i ke mausam men jan-e-jan mujh ko
jo bhuuk pyaas hai kam kam yahi mohabbat hai
tire baghair jo ḳhvabon ke shahr men bhi dost
mira mizaj hai barham yahi mohabbat hai
visal-rut ho ki furqat hamare dil men sanam
jo bekali si hai dam dam yahi mohabbat hai
mira yaqin ki yaum-e-alast men ‘kashif’
kiya gaya hamen baham yahi mohabbat hai
Leave a Reply