Wafa Naqvi
mausam ho koi yaad ke ḳheme nahin uThte
sahra se tire chahne vaale nahin uThte
hain raqs ke aalam men sulagte hue chehre
aise to kisi ghar se janaze nahin uThte
ik pyaas ne kaisa ye mujhe toḌ diya hai
hathon se mire aaj bhi kuuze nahin uThte
suraj ke tamanche se falak jaag gaya hai
bistar se magar phir bhi sitare nahin uThte
ghar apne namazi to sabhi lauT ga.e hain
masjid se magar aaj musalle nahin uThte
muddat se shab-o-roz ke mathe pe likha hai
aa jaa.en jo ik baar zamane nahin uThte
hai us ke azabon pe karam us ka musallat
rahmat ke kabhi ghar se farishte nahin uThte
Leave a Reply