dida-e-ashk-bar hai apna
aur dil be-qarar hai apna
rashk-e-sahra hai ghar ki virani
yahi rang-e-bahar hai apna
chashm-e-giryan se chak-e-daman se
haal sab ashkar hai apna
ha.e-hu men har ek khoya hai
kaun yaan gham-gusar hai apna
sirf vo ek sab ke hain muḳhtar
un pe kya iḳhtiyar hai apna
bazm se un ki jab se nikla hai
dil gharib-ud-dayar hai apna
un ko apna bana ke chhoḌenge
baḳht agar sazgar hai apna
paas to kya hai apne phir bhi magar
us pe sab kuchh nisar hai apna
ham ko hasti raqib ki manzur
phuul ke saath ḳhaar hai apna
hai yahi rasm-e-mai-kada shayad
nashsha un ka ḳhumar hai apna
jiit ke ḳhvab dekhte jaao
ye dil-e-bad-qimar hai apna
kya ghalat sochte hain ‘mira-ji’
sher kahna shi.ar hai apna
Leave a Reply