Muneer Niyazi
aai hai ab yaad kya raat ik biite saal ki
yahi hava thi baagh men yahi sada ghadiyal ki
mahak ajab si ho gai pade pade sanduq men
rangat phiki pad gai resham ke rumal ki
shahr men dar tha maut ka chand ki chauthi raat ko
inton ki is khoh men dahshat thi bhaunchal ki
shaam jhuki thi bahr par pagal ho kar rang se
ya tasvir thi khvab men mere kisi khayal ki
umr ke saath ajiib sa ban jaata hai aadmi
halat dekh ke dukh hua aaj us pari-jamal ki
dekh ke mujh ko ghaur se phir vo chup se ho gae
dil men khalish hai aaj tak is an-kahe saval ki
Leave a Reply