yuun naqab-e-ruḳh muqabil se uThi
chashm-e-sad-nazzara mushkil se uThi
bazgasht-e-shor-e-gharqabi sahi
koi to avaz sahil se uThi
qafile hain kitne darmanda ḳhiram
gard rahon se na manzil se uThi
thaam kar dil kya uThe arbab-e-dard
ik qayamat teri mahfil se uThi
sar se bhi guzri hai tufan ki tarah
jab bhi koi mauj-e-ḳhun dil se uThi
chashm-e-nazzara se manind-e-hijab
tohmat-e-nazzara mushkil se uThi
Leave a Reply