ḳhayal men hai jo chehra nazar bhi aa.ega
vo apne ghar se kabhi mere ghar bhi aa.ega
bichhaḌte vaqt ka manzar bhi dhyan men rakhna
safar men kaam ye raḳht-e-safar bhi aa.ega
nikal to aa.e hain zindan-e-tirgi se magar
ye sochte hain hamen kuchh nazar bhi aa.ega
sabhi na ghar ke darichon se bach ke guzrenge
hava ka koi to jhonka idhar bhi aa.ega
malal saya-e-divar-o-dar abhi se kya
ye marhala to sar-e-rahguzar bhi aa.ega
miri nava to kabhi ra.egan nahin jaati
agar vo ghar men hua baam par bhi aa.ega
kise guman tha ‘ḳhavar’ vahan ki miTTi men
yahan ki ab-o-hava ka asar bhi aa.ega
Leave a Reply