Ajmal Siraj
main ne ai dil tujhe siine se lagaya hua hai
aur tu hai ki miri jaan ko aaya hua hai
bas isi bojh se dohri hui jaati hai kamar
zindagi ka jo ye ehsan uThaya hua hai
kya hua gar nahin badal ye barasne vaala
ye bhi kuchh kam to nahin hai jo ye aaya hua hai
raah chalti hui is rahguzar par ‘ajmal’
ham samajhte hain qadam ham ne jamaya hua hai
ham ye samjhe the ki ham bhuul gae hain us ko
aaj be-tarah hamen yaad jo aaya hua hai
vo kisi roz havaon ki tarah aaega
raah men jis ki diya ham ne jalaya hua hai
kaun batlae use apna yaqin hai ki nahin
vo jise ham ne ḳhuda apna banaya hua hai
yunhi divana bana phirta hai varna ‘ajmal’
dil men baiTha hua hai zehn pe chhaya hua hai
Leave a Reply