abr chha.ega to barsat bhi ho ja.egi
diid hogi to mulaqat bhi ho ja.egi
ai dil-e-husn-e-talab mashq-e-tasavvur tu baḌha
phir jo chahega vahi baat bhi ho ja.egi
sar jhuka.e hue baiThe ho abas bada-kasho
jaam uThaoge to barsat bhi ho ja.egi
aaj us ne na.e andaz se dekha hai mujhe
ghaliban aaj koi baat bhi ho ja.egi
be-ḳhudi sirf dalil-e-gham-e-pinhan hi nahin
ek din kashif-e-halat bhi ho ja.egi
bul-havas dahr ke rangin manazir se na khel
din hua hai to yahan raat bhi ho ja.egi
jaan de kar tiri mahfil men kabhi jan-e-‘aziz’
jaur ki tere mukafat bhi ho ja.egi
Leave a Reply