Koi Ye Kah De Gulshan Gulshan

koi ye kah de gulshan gulshan

laakh balaen ek nasheman

qatil rahbar qatil rahzan

dil sa dost na dil sa dushman

phuul khile hain gulshan gulshan

lekin apna apna daman

ishq hai pyare khel nahin hai

ishq hai kare-shisha-o-ahan

khair mizaj-e-husn ki ya-rab

tez bahut hai dil ki dhadkan

aa ki na jaane tujh bin kab se

ruuh hai lasha jism hai madfan

aaj na jaane raaz ye kya hai

hijr ki raat aur itni raushan

umren bitin sadiyan guzrin

hai vahi ab tak ishq ka bachpan

tujh sa hasin aur khun-e-mohabbat

vahm hai shayad surkhi-e-daman

barq-e-havadis allah allah

jhuum rahi hai shakh-e-nasheman

tu ne sulajh kar gesu-e-janan

aur badha di shauq ki uljhan

rahmat hogi talib-e-isyan

rashk karegi paki-e-daman

dil ki mujassam aina-saman

aur vo zalim aina-dushman

baithe ham har bazm men lekin

jhaad ke utthe apna daman

hasti-e-shaer allah allah

husn ki manzil ishq ka maskan

rangin fitrat saada tabiat

farsh-nashin aur arsh-nasheman

kaam adhura aur azadi

naam bade aur thode darshan

shama hai lekin dhundli dhu.dli

saaya hai lekin raushan raushan

kanton ka bhi haq hai kuchh akhir

kaun chhudae apna daman

chalti phirti chhanv hai pyare

kis ka sahra kaisa gulshan

Leave a Comment