aadat miri duniya se chhupane ki nahin thi
vo baat bhi kah di jo batane ki nahin thi
main ḳhush huun bahut gard ko a.ine pe rakh kar
di vo mujhe surat jo dikhane ki nahin thi
ham kha ga.e dhoka tiri ankhon ki nami se
vo choT dikha di jo dikhane ki nahin thi
achchha hua niind aa ga.i arbab-e-vafa ko
aage ye kahani bhi sunane ki nahin thi
yuun dil ko kiya sho.ala-e-gham tere havale
is ghar men koi chiiz bachane ki nahin thi
kuchh is liye apna na saka is ko zamana
‘saulat’ ki jo aadat thi zamane ki nahin thi
Leave a Reply