jab tu hi kahin be-sar-o-saman paḌa hai
be-kar tiri chaah men insan paḌa hai
phir kis ki zarurat mujhe Dasti hai shab-o-roz
ab dil men mire kaun sa arman paḌa hai
divar men dar karke bahut ḳhush to hua main
kambaḳht abhi raḳhna-e-dalan paḌa hai
mujh zarra-e-na-chiz ki auqat hi kya hai
qadmon men tire vaqt ka sultan paḌa hai
hone de mujhe vasl ki saa.at se baghal-gir
laḌne ke liye hijr ka maidan paḌa hai
vaqif hi nahin us ki kisi chaal se ‘aḳhtar’
vo jis se mira vasta har aan paḌa hai
Leave a Reply