dil ke bujhte hue zaḳhmon ko hava deta hai
roz aata hai naya ḳhvab dikha deta hai
us ka andaz-e-masiha.i nirala sab se
charagar hosh men aane pe dava deta hai
har qadam ḳhaak men kuchh ḳhvab milate rahna
hijr ki raat yahi shaghl maza deta hai
marne jiine ka kahan hosh tire rindon ko
pa-e-vahshat bhi ajab naqsh bana deta hai
dastaken deta hai paiham dar-e-dil par koi
ek saaya mujhe nindon se jaga deta hai
phuul sa lahja hua karta tha jis ka ‘zakir’
ab vo baton men koi baat bana deta hai
Leave a Reply