Khawaja Javed Akhtar
guman to Thiik main kaise kahun yaqin bhi hai
ki mere paanv ke niche kahin zamin bhi hai
dilon men duniya basa.e hue to phirte ho
ḳhayal rakhna ki duniya ke saath diin bhi hai
hamare jaib-o-gareban men saanp kya milta
use ḳhabar hi nahin thi ki astin bhi hai
taras jo kha ke kisi janvar pe shaah bane
hujum-e-shah men koi sabuktagin bhi hai
suḳhan-shanas nahin zud-go bhi hai ‘javed’
paḌha-likha hi nahin aadmi zahin bhi hai
Leave a Reply