har taraf daur-e-faramoshi hai
zehn sahma hua baitha hai kahin
apne atraf hifazat ki tanaben gaade
jab koi baat nahin yaad us ko
phir ye dahshat ka sabab kya maani
aur hifazat ka junun kaisa hai
Daro us vaqt se jab aisa khauf
jis ke asbab nahin milte hain
zindagani men chala aata hai
ruh-e-vijdan bhatak jaati hai
tarz-e-afkar badal jaati hai
sahra aa jaate hain divaron men
asmanon ke varaq khulte hain
jauq-dar-jauq pare ruhon ke
chalte-phirte nazar aa jaate hain
aur zamin kanch ke tukdon ki tarah tutti hai
vahm tasvir men Dhal jaata hai
kam-nigahi ka tasallut chup-chap
dur-andeshi ko kha jaata hai
Daro us vaqt se jab aisa khauf
zindagani men chala aata hai
jis ke asbab nahin milte hain