Shakeel Azmi
sang the pighle to paani ho ga.e
ham vo chehre jo kahani ho ga.e
khel hai ab har taraf tasvir ka
lafz saare be-ma.ani ho ga.e
baat karni thi hamen jis se bahut
ham usi ki be-zabani ho ga.e
chand qatre rah ga.e the aankh men
vo bhi dariya ki ravani ho ga.e
sabz mausam aa gaya tha room men
aa.ine bhi dhani dhani ho ga.e
asman par rah ke bhi tum ḳhaak ho
ham zamin par asmani ho ga.e
chhanv men gautam ki kya baiThe ‘shakil’
thoḌe thoḌe ham bhi gyani ho ga.e
Leave a Reply