Sarwat Zehra
ḳhatir-e-hal madarat nahin ki ja.egi
ham se is taur mohabbat nahin ki ja.egi
ro.enge sina-e-aflak ke chaak hone tak
is qadar ham se muravvat nahin ki ja.egi
kis tarah ḳhvab ka imkan-e-ziyan kam hoga
aap se kashf-o-karamat nahin ki ja.egi
sanehe ḳhaak ne phir bandhe mire daman se
dil se is darja sa.ubat nahin ki ja.egi
ham riya-kar-e-zamana hain magar zinda hain
raushni teri hazimat nahin ki ja.egi
teri ruḳhsat ke samay ham ye khaḌe sochte hain
halat-e-hijr to ruḳhsat nahin ki ja.egi
is mulaqat pe ik faisla ho jaane do
baat ba-tarz-e-rivayat nahin ki ja.egi
Leave a Reply