ghaḌi ghaḌi na.e chehre badal rahe hain ham
na.i hayat ke sanchon men Dhal rahe hain ham
shab-e-sitam ke andhere men sham.a ki manind
ḳhud apni aag men sadiyon se jal rahe hain ham
hazar vaqt ke tufan ne Thokaren marin
magar chaTan ki surat aTal rahe hain ham
na rahbar hai koi aur na manzilon ke nishan
na jaane kis ke sahare pe chal rahe hain ham
tamazat-e-nigah-e-yar ka karishma hai
ki aaj barf ki surat pighal rahe hain ham
sajao dar-o-rasan le ke aao zanjiren
hudud-e-sahn-e-chaman se nikal rahe hain ham
hamen talash na kiije amal ki duniya men
usuul ban ke kitabon men pal rahe hain ham
Leave a Reply