Ajmal Ajmali
azar bahut lazzat-e-azar bahut hai
dil dast-e-sitam-gar ka talabgar bahut hai
iqrar ki manzil bhi zarur aaegi ik din
is vaqt to bas lazzat-e-inkar bahut hai
yaran-e-safar koi dava dhund ke laao
insan mire daur ka bimar bahut hai
haan dekhiyo irfan-e-baghavat na jhulas jaae
manzar miri duniya ka sharar-bar bahut hai
ham ghar ki panahon se jo nikle to ye jaana
hangama pas-e-saya-e-divar bahut hai
qatil ki inayat ka maza aur hai varna
jaan lene ko ye saans ki talvar bahut hai
kya log hain ye soch ke baiThe huun gharon men
bas zulm se be-zari ka iz.har bahut hai
halat-e-zamana se laraz jaate hain ‘ajmal’
yuun hai ki zamane se hamen pyaar bahut hai
Leave a Reply