Rajendra Nath Rahbar
paḌi rahegi agar gham ki dhuul shaḳhon par
udaas phuul khilenge malul shaḳhon par
abhi na gulshan-e-urdu ko be-charagh kaho
khile hue hain abhi chand phuul shaḳhon par
nikal paḌe hain hifazat ko chand kanTe bhi
hua hai jab bhi gulon ka nuzul shaḳhon par
hava ke samne un ki bisat hi kya thi
dikha rahe the baharen jo phuul shaḳhon par
nisar-e-gul ho mila hai ye izn bulbul ko
hua hai hukm gul-e-tar ko jhuul shaḳhon par
vo phuul pahunche na jaane kahan kahan ‘rahbar’
nahin tha jin ko Thaharna qubul shaḳhon par
Leave a Reply